3888.hk 金山軟件

小弟開始玩股票唔係好耐，不過就一路都係交學費，做點心...........

所以決定開始好好記錄自己買賣既原因為以後做分析及反省！


今日開始研究既係︰3888.hk 金山軟件




公司概括

集團主席	雷軍
發行股本(股)	1,168M
面值幣種	美元
股票面值	0.0005
行業分類	軟體及資訊科技顧問
公司業務	集團主要業務為研究、開發、經營及分銷網絡遊戲、移動電話遊戲及休閒遊戲服務及研究、開發、經營及分銷互聯網安全、辭典及辦公室應用軟件產品。

其實我唔識得點去分析一隻股票，所以今日只好抄住其他人既文章先~



======================================================================= (轉自 http://blog.yahoo.com/_GCREBR6O36RETLBQBM4EAQNNOA/articles/154471)

好多日無寫過個Blog，係時候出擊一下。

近來留意到一隻野，叫做金山軟件(3888)，睇落盤數都幾好，個朵又幾響，息口又好，所以都留意下。不過今次唔玩數目字，先玩業務分析。

簡單講下隻野，顧名思意，係做軟件生意，不過不在金山在中國。公司生意主要係國產 MS Office 同 金庸群俠傳online。以下是公司舊年的年報點滴：

娛樂軟件(即係遊戲)，佔收益66%，營業額下降6%，公司話係因為2010年無出新遊戲，加上水滸Q傳又唔Q繼續 玩，所以就跌左喇。每日平均最高同步人數有80萬人，比去年少左32%。有成80萬人一齊打機，都幾Happy 架喎，好明顯其中有好多外卦人士，但咪理，總之有人玩就有人要比錢。打機平均41蚊人仔一日，都幾貴架喎，我細個玩老正41蚊可以玩幾個月。

應用軟件(即係Office啦~)，佔收益33%，營業額跌2%，因為網絡安全服務變左免費，所以無錢收。不過公司話祖國同胞同日本武士買多左Office， 所以有返少少渣拿。

毛利率87%，高定低？除左賣老翻之外，要搵到另一隻更高毛利率的股票都幾難，不過科網呢家野就係咁，所以個人認為都無野好講，重想點丫，賣老翻毛利率99%咩？

研發成本多左36%，本來係一件好事，不過睇真原來係員工福利同加人工，咁對研發係咪真係有幫助架？呢點真係值得懷疑，加上人工加左，唔該錢都賺返多先得架....

睇返各項業務，首先係防毒

公司賣左25%廣州金山股權，同時又買返Conew。據說間野係搞「雲安全」技術，特登上網查下，雲端技術呢種唔受 好似文仔呢類古人所認識的火星科技，睇落真係一舊雲，不過於未來日子相信會大行於天下(可能而家已經係，不過我唔識)，而「雲安全」就係其中的防毒。公司 話，佢地的防毒技術得到國際權威認可，係國家網絡上先進的防護品牌。咁呢點我都信，話晒國家都有比錢資助佢，而且佢防到毒，同防到人在網絡搞 squence有正面的幫助。

至於軟件呢

金山WPS Office 得到老爺的垂青，於政府機構大行(梗係，無土製成日要用美國佬的窗口奧弗士，陣間美國佬搞事咪企左係到)，所以實賣得。據講重有知識產權保障，咁我都覺得全中國可以減少到1隻金山Office老翻的出現，1隻咁大把啦。

打機方面

公司話舊年無推出新遊戲(但係公司有66%收入係遊戲架喎....咁同在糧倉唔防士兵防守有咩分別？)不過公司話， 買左20%西山居工作室股權，進行重組，咁即係話派返新兵上去守住，咁都係好事黎。2011年，公司會有五隻遊戲上場，分別係月影傳說、熱血戰隊、蒼穹之 怒，同埋兩隻唔知乜水。聽到個名，都唔知係咩，不過時下小朋友玩唔玩，又真係試過先知。

諗左一陣，其實我好唔明。公司講到最把炮的防毒同埋軟件有幾堅，但係主要收入又係遊戲，而舊年又無新遊戲推出，個情況詭異到詭異。

睇埋個季度業績，其實都係咁上下野，跌左20幾%都唔係重點，因為無本質上的改變，都係要等新GAME 出。不過個季度報告，有幾句話我好Like：

「於二零一一年五月六日，金山快盤雲存儲服務被列為中關村九大雲服務平台之一。二零一一年五月十一日，金山辦公軟件Android 版本正式發佈。」

雲端技術同智能手機乃係大勢所趨，公司有呢兩方面的發展，即係代表未來唔會落伍，好似諾基亞咁脫晒節。換言之，即係有未來，唔係死胡同。

講左咁耐，其實我幾鐘意隻股票。

======================================================================= 

(轉自 http://blog.yahoo.com/_GCREBR6O36RETLBQBM4EAQNNOA/articles/154482)

很感激讀者留言，說期待金山軟件下集，估唔到我個 blog 原來都有收視，實在太令人感動。

好唔好意思，呢篇文拖左成個月都未寫好，因為近來比較事忙，希望各位多多原諒。

寫呢個下集之前，有樣野想再提提大家。文仔寫呢個 blog主要目的係想將自己學的野記低，由於小弟重係初學者，對於股票分析的能力仍然好基礎同膚淺，請大家要注意，唔好咁快睇人頭買股票，害死大家我真係會好過意唔去架~

好喇，言歸正轉，相信大家都有留意金山軟件近日升得好衡，原因乃係騰訊入股。我先前梗係唔知啦，唔駛我重唔訓身入去 咩。不過由於近日同朋友仔都有講開呢隻野，個朋友仔4.41賣左，4.1買返，4.3又賣左，諗住4蚊買返，黎個密食當三番，點知賣左就入股。唉，都話炒 炒貢贏十次輸一舖就係到，呢次就話炒上左賺少左，下次炒落去就唔見錢架喇。所以我都係鐘意買左放埋一邊。

上集講過隻野的少少年報及基本業務分析，下集講數字：
文仔買股三寶：股息、現金、er....暫時未諗到 XD
對上一次全年業績，股息派0.4，不過有0.25係特別股息，即係得0.15係本來股息。以5.21股價計，0.4有7.67厘，0.15有 2.88厘。(本來我6月寫個時隻野係4.5，0.4計有8.88厘、0.15計都有3.33厘)3厘息是文仔會接受的範圍，而7厘就更加無問題~

現金方面，全年借貸只有1億左右，但現金有16.56億，淨現金就有15億左右，共11.38億股，每股有1.36左 右現金。以往幾年盈利是4億左右，極端一點講，即係話唔做生意3年都得，所以資產質素好安全。再者，現金咁充足，要繼續派特別股息其實問題都不大，不過當 然要睇管理層點做，好似迪生創建咁就中招喇(不過人地都重有5厘息架)。金山軟件上巿日子唔太長，好難斷定佢管理層作風好唔好，但係而家老騰入左股，我相 信作為母公司，老騰都希望佢可以派到息，咁阿媽先有水飲。雖則老騰並不是全資擁有/最大單一股東，但相信金山保持派息的機會都ok。

上述兩寶都算合心水，之後就睇搵錢方面

今年盈利倒退左1百萬咁大把，盈利4.4億、eps 0.4相較於5.21的股價，pe為13倍。如果用5年平均盈利計算，4.35億，其實都係差唔多。作為一隻科技股(唔識分類，叫住先啦)，13倍pe真 係有點兒搞笑。騰訊 pe40倍、阿里巴巴pe37倍、網龍pe60倍、金蝶pe35倍。老師尊話唔買15倍pe以上的股票，咁要買呢類股票睇黎除左金山軟件之外都無第二個選 擇。平定貴？我個人唔接受20倍或以上pe的股票，但15倍以內的優質資產高息股，我會考慮。

不過今年公司的固定資產輕微下降，大概係因為賣左廣州金山所致，不過基本上都持平。近五年黎睇都一直在擴充，加上上集話佢生意唔係死胡同，所以應該有前途(用自己篇文引證返自己，我都得架喇，呵呵~)

經營活動現金流五年都係正數，證明公司一直係做緊生意同有盈利，呢個有得加分。
營業額方面今年跌左唔少，公司解釋話因為無新game出，又有部份軟件變成左免費，所以就下跌喇。

從數字黎講，公司今年業績麻麻，不過亦算平穩。每間公司都有升跌起伏的時候，暫時看來金山軟件業務未有太大突破的跡象。今年的前景都要靠五隻新game主導，如果唔得業績都有大跌風險，當然得左就發死啦，呢個亦都係我唔鐘意買科網股的原因，好似賭錢咁。

從盈利能力同資產分別計算下隻股票：

我係保守投資者，俾到極限都係15倍pe，0.4*15=6蚊。

資產淨值2蚊，由於科網股除左電腦同人腦之外無咩資產可言，所以俾高少少pb，2.5*2=5蚊。

加埋除2，即係5.5。

之前4.5，都有水位，而家5.2，感覺就麻麻喇。不過我俾極都係15倍pe同2.5倍pb，巿場可以俾騰訊40倍pe15倍pb、金蝶35倍pe6.3倍pb，咁金山軟件可以炒到幾錢，學財演話齋我無水晶球喇~

都係個句，巿場大把好選擇，南股唔買買北股，唔好揀著幼萬股就得啦~